Tag 5 bis 7 (3.4-5.4 /Cala Llevado T.d.M)

nach de erste paar täg underwägs hämmer ois für en campingplatz i de nöchi entschiide.

in cala llevado (tossa de mar) hämer für zwei nächt äs plätzli buächet und händs gnossä chöne duschä und mal chli a cho. sisch nämli garnöd eifach am verstand welle biibringe das mer kei 2 wuchä underwägs sind sondern e gschetzti ewikeit. aber ich dänkä au mir zwei schwiizer uhrwärchli werdet na chönä abefahrä und oisii usziit gnüssä.

i so chline örtli wie dem cala llevado isch zimli alles dicht wäg covid. doch au da hets es beizli gha wo mer hät chöne ii cherä, sogar e band het gspiilt und de sangria isch gflossä; äntlich feriä... (:

am negstä tag isch de marco scho am morgä go ränne und ich ha na bitz bettwärmi gnossä, en zmorgä mit warme bohnä, kaffi und rieswafflä hät ois gstärkt und mer händ die trillione vo stägetritt in a griff gnah für as meer abä. verschiideni büchtli und felse sowiit saug mag luägä hämer überquert bis mer au es plätzli gfunde händ zum chli sunnetankä, spiili mache, fuuhlänze und natürli hörndli vom gas-chocher zässe. (:

zrugg ufem camping, hämmer dii erst duschi und ois gnossä....

jaa i dem stiil sind die paar täg ufem camping na wiiter gange und scho hämer oises wiiterä fährtli planet....