Tag 167 bis jetzt (11.9.-28.9.21 Befort / Döggingen / Wetzikon / Illnau)

mit sunne am himmel und tau uf de wiese isch de negsti morge gstartet. nachem gmüätlich lange z`morge sind mir nomal bitz dur d`wälder gstifflät und scho en huufe farbigi herbstbletter vo de bäum gseh tanzä.

am namittag hend mer ois i paar partiä brandy dog gmässe und en apero gschlürft bevors as a füürä gang eisch für de z`nacht.

jez ischs`s so wiit; am negste morge heisst`s s`letschmal sunnestorre innä und campingstüähl versorgä. de gan admiral startklar mache zum wiiter fahrä.

mit speziell gmischte gfühl, sind mir na paar kilometer dur luxemburg bis mer d`sauer überquert händ und in dütschland gsi sind. siibä stund spöter und ohni viil stau sind mir in döggingen (bräulingen/schwarzwald) a cho. wo mir ufeme parkplätzli am waldrand und nöchi gauchaschlucht parkiert hend. nach so langer autofahrt händ mer ois na bitz müsse go d`füäss verträtte im wald. eimal me händ mer derfe en wunderschönä sternehimmel betrachtä und nomal chli in erinnerige schwelge vo de letschte 5 mönet.

de tag vo de wahrheit isch a broche, es gaht hei zuä. sisch na en chatzesprug bis schaffhusä und vo det gahts richtig thurgau und den ab i e super feini beckerei. nacheme schnitzelbrot, thon canape und kaffi isches wiiter nach wetzikä. wo mer kathleen und de jens überrascht händ. nacheme z`nacht und de letschte nacht vo derä reis im admiral isches am negste tag nach hettlinge gange. au da isch oisi überraschig glückt.

dii erste paar sache händ mer scho is auto glade und nach illnau buxiert.

so händ mer s erst mal oisi noii wohnig beguätachtet und a gfange zügle.

nachem froidige hallo bi paar kollegä und de familiä händ mir ois natürli is züg gleit und hend züglet, möbel gmacht und sind scho rächt wiit mit iirichte.

s`dihei a cho isch speziell, sisch wunderschön wiider dihei z`sii aber sisch au trurig und schaad isch die schön und frei ziit jez wücki eifach verbiii.....

natürlich wüssed mer das ois die mönet "freiheit" niemert cha näh und mer für immer a die wertvolle moment chönd dänke und de vo träumä.....

jez händ mer na bitz ziit, bevors am 4. oktober wiider heisst ab go bügglä. aber halb so wild, am 24.12. sind schowiider wiehnachts-färiä.... ((: