Tag 148 bis 154 (23.8-29.8.21 Nismes / Froidchapelle / Poupehan)

vo nimes isches richtig brüly de pesche wiiters. es chlises dörfli i de ardenne wo gschicht na guät sichtbar isch. es isch ab 1940 in "die wolfsschlucht" umbennänt worde und s`hauptquartier vo de ss gsi. bis den aber 1944 s`lager vo de widerstandskämpfer zrugg ghollt worde isch. nach paar spannende stunde i dere umgäbig und eme chline museum händ mer ois wiider in admiral gsezt und sind wiiter richtig froidchapelle. e ortschaft wo amene grosse stausee liit und e grossi wiise am waldrand hät wo mer mit em camper cha stah. da leider s`wetter nöd soo sunnig und warm isch müänd mer ois chli demit abfinde das alles matschig und nass isch. nacherä rägenacht isch am negste morge aber doch mal wiider d`sunne führe cho, so häts en kaffi mit sunne im gsicht gäh. (:

langsam aber sicher isch so fascht jedes kleidigstuck nass, dräckig und muffelig vo dere ständige füähchtigkeit. drum stüred mer es campingplätzli a wo mer wiider mal cha wäsche und s`züg tröchnä. sisch en super schöne camping (in poupehan) wo ufeme inseli z`mitzt i de semois liit. zum guätä glück sind die nöd so vom hochwasser betroffe gsi wie anderi teil da in belgiä und soo händ mer es cools plätzli diräkt am fluss chönä ha. am namittag isch gwäsche worde und d`sunne het au truckt so händ mer ois en gmüätliche namittag gönnt. de tag druff isch hammer gsi, am morge herbstliche näbel wo vom fluss ufstiigt und ab em mittag strahlend blaue himmel mit sunneschii. so händ mer de tag eifach gnosse mit sunne tankä und de marco miteme schwumm im fluss. am abig hemmer gführlet und sind mit eme päärli holländer is gspröch cho. de sohn vo dennä hät probiert fischä und so hät sich de marco nüm chöne zrugg hebä, hät sini angelruätä uspackt isch in fluss ie gstande und het doch prompt en schön grosse egli usse zugä. miteme riese stolz het er de fisch usgnah und ab uf de grill mit em. isch aso super fein gsi. (:

am negste morge isch scho vor de 8i tagwach gsi. mer hend en högerige und lange spazottel vor ois gha. sind nämlich nach bouillon ufe marschiert wo mer den am 12i zwei kayak reserviert händ. s`isch ganz wunderschön gsi, au wenn mer bitz verpisst worde sind bim laufe, hät defür s wetter möge hebe bi de 15km im kayak. sisch en heide spass gsi sogar wo mer über ei schnelle sind wo oisi kayaks het möge fluätä. (: so hets en stopp gäh ufem negste inseli wo mer oisi klamotte chli tröchnet händ bis denn wiiter gange isch. mit chli muskelkater isches am negste tag doch ab i dwanderschuäh und dur de wald, über felsigi wägli bis nach rochehaut. det händ mer oisi ruckseck imene chline läbesmittellade gfüllt, händ ois miteme grosse sandwitch gstärkt und sind de schöni wäg wiider zrugg richtig camping. näbscht viil verschiidene pilzli hämer au amene kleiber chöne zuluäge wo wii wild und chopf über a de bäum na g`huscht isch. (:

am letschte tag uf dem mega friidliche camping isches den na ab go fischä. das aber viil "flussgras" gha het isches echt lang gange bis mer mal es passends örtli gfunde händ. deführ hets det au fisch gha. leider isch aber de brocke vomene fisch stärcher gsi wie silch und so ischer churz bevor mer en duss gha hend wiider ab und devo. sisch schaad, will leider het er jez es pircing i de lippä und mir hend kenn z`nacht gha....

de abig hend mer am führ na usklinnge lah, sogar de himmel het sich möge öffne und so hämer dutzendi vo sterne chöne gseh.

d`fahrt isch wiiter nach saint hubert wo mir ufeme plätzi innere wald liechtig stönd und sicher nachli dur d`wälder werdet schliichä. (: